प्रतिनिधी/भंडारा
मनोहरभाई पटेल अभियांत्रिकी महाविद्यालय शहापूर येथे जागतिक महिला दिन उत्साहात साजरा करण्यात आला. या प्रसंगी कार्यक्रमाचे अध्यक्ष महाविद्यालयाचे प्राचार्य डॉ. प्रल्हाद हरडे होते. प्रमुख पाहुणे स्वर्णपदक विजेती कु. प्राची चटप, बाल उदय संस्थेच्या सानिका वडनेरकर, प्रा. दीपाली ईश्वरकर, प्रा. अजय मोतीवाल, दुर्गा चटप, विलास केजरकर उपस्थित होते.
सावित्रीबाईंनी शिक्षणाचे दारे उघडून महिलांना अभिव्यक्त होण्याचे स्वातंत्र्य दिले. यातुनच नौकरी, शिक्षण, खेळ अशा अनेक क्षेत्रांत महिलांना संधी मिळाली आहे. त्यातूनच स्त्रीया स्वावलंबी झाल्या आहेत. आई – वडिल अडाणी, अशिक्षित किंवा गरिब असले तरी तडजोड करून उच्च शिक्षण देण्यासाठी कुठलीही कसर सोडत नाही. आपल्या मुला-मुली कडून खुप अपेक्षा असतात. त्यांच्या अपेक्षांवर पाणी फेरू नका. ध्येय निश्चित करून यश संपादन करावे. असे प्रतिपादन भारतीय आट्यापाट्या संघाची कर्णधार तथा स्वर्णपदक विजेती कु. प्राची चटप हिने केले.
जागतिक महिला दिनानिमित्त विद्यार्थी विद्यार्थिनींनी महाविद्यालयाच्या परिसरात महिलांना संदेश देणाऱ्या विविध रांगोळ्या काढल्या होत्या. उपस्थित मान्यवरांनी विविध मार्मिक उदाहरण देऊन मार्गदर्शन केले. कार्यक्रमाचे संचालन प्रा. शितल गभणे यांनी तर उपस्थितांचे आभार प्रा. दीपाली ईश्वरकर यांनी मानले.
कार्यक्रमाच्या यशस्वीतेकरिता प्रा. प्रशांत लांजेवार, प्रा. स्वाती कोल्हटकर, दिक्षा शेंदरे, आयुष वैद्य व मनोहरभाई पटेल अभियांत्रिकी महाविद्यालयातील प्राध्यापक, कर्मचारी तसेच विद्यार्थी -विद्यार्थिनींनी सहकार्य केले.
