भंडारा दर्पण/प्रतिनिधी
भंडारा : लग्नकार्य आटोपून नागपूरला परत जात असताना पाचगाव जवळील कुही फाट्यावर झालेल्या चारचाकीच्या अपघातात पत्नीचा जागीच मृत्यू झाला तर पतीसह अन्य दोघे गंभीर जखमी झाले. ही घटना सोमवारी( १४ एप्रिल) रात्री बारा वाजता दरम्यान घडली. अपघातग्रस्त भंडारा जिल्ह्याच्या लाखांदूर तालुक्यातील पिंपळगाव कोहली येथील रहिवाशी आहेत. अपघातात नीलम कृष्णा शेंडे (२६) हिचा जागीच मृत्यू झाला असून कृष्णा शेंडे, मुलगी देवाशी तर साळा हेमंत असे तिघे गंभीर जखमी झाले. त्यांना नागपूर येथील दवाखान्यात उपचारासाठी भरती करण्यात आले आहे.
कृष्णा शेंडे हा आपल्या परिवारासह नागपूर येथील नातेवाईकांकडे लग्न कार्यासाठी गेले होते. ब्रम्हपुरी येथे लग्नकार्य आटोपून सोमवारी रात्री परत नागपूरला स्वतःच्या चारचाकी वाहनाने जात असताना पाचगाव जवळील कुही फाट्यावरील उड्डाण पुलावर अचानक चारचाकी वाहन दुभाजकाला आदळल्याने पलटी झाले. यात कृष्णा शेंडे यांची पत्नी नीलम शेंडे हिचा जागीच मृत्यू झाला. तर स्वतः कृष्णा शेंडे अत्यंत गंभीर अवस्थेत असल्याची माहिती आहे. सदर घटनेची माहिती मिळताच अपघातग्रस्तांना नागपूर येथे उपचारासाठी दाखल करण्यात आले आहे.
