भंडारा दर्पण/प्रतिनिधी
भंडारा : प्रेमसंबंधातून झालेल्या वादात मित्रानेच मित्राची चाकूने भोसकून निर्घुण हत्या केल्याची घटना तुमसर तालुक्यातील देव्हाडी येथे घडली. अंकुश साठवणे (वय ३५, रा. नेहरू वॉर्ड, देव्हाडी) असे हत्या करण्यात आलेल्या ग्रामपंचायत सदस्याचे नाव आहे. तर रामेश्वर उर्फ मुन्ना बिरनवारे असे आरोपीचे नाव आहे. ही घटना रविवारी (२३ मार्च) संध्याकाळी ५ वाजताच्या सुमारास घडली असून परिसरात खळबळ उडाली आहे.
प्राथमिक माहितीनुसार, मृतक अंकुश साठवणे आणि आरोपी रामेश्वर उर्फ मुन्ना बिरनवारे हे चांगले मित्र होते. मात्र, काही दिवसांपूर्वी महिलेच्या अवैध संबंधांवरून त्यांच्यात मोठा वाद झाला होता. त्यानंतर अंकुश नागपूरला जाऊन राहू लागला होता. मात्र, 22 मार्च रोजी तो पुन्हा देव्हाडीला परतला. 23 मार्च रोजी, मृतकाच्या वडिलांनी दोघांमध्ये समेट घडवून आणण्यासाठी आरोपी मुन्नाला आपल्या घरी बोलावले. समेटाची चर्चा सुरू असतानाच मुन्नाने अचानक त्याच्या सोबत आणलेल्या चाकूने अंकुशवर सपासप वार केले. गंभीर जखमी झालेल्या अंकुशचा जागीच मृत्यू झाला.
आरोपी पोलिसांच्या ताब्यात
घटनेची माहिती मिळताच तुमसर पोलीस घटनास्थळी दाखल झाले. मृतदेह ताब्यात घेऊन शवविच्छेदनासाठी तुमसर उपजिल्हा रुग्णालयात पाठवण्यात आला आहे. दरम्यान, आरोपी मुन्ना बिरणवारे हा हत्येनंतर फरार झाला होता. मात्र पोलिसांनी त्याचा शोध घेत आरोपीला अटक केली आहे. या घटनेत मृतकाची पुतणी आंकाक्षा संतोष साठवणे (१५) हिने मध्यस्ती केली असता ती पण जखमी झाली आहे.
देव्हाडी परिसरात भीतीचे वातावरण
या घटनेमुळे संपूर्ण देव्हाडी गावात भीतीचे वातावरण पसरले आहे. ग्रामस्थांमध्ये संतापाचे भाव असून पोलिसांनी अटक केलेल्या आरोपीवर कठोर कारवाई करावी, अशी मागणी केली जात आहे. या हत्याकांडामुळे प्रेमसंबंधातून होणाऱ्या गुन्ह्यांबाबत पुन्हा एकदा गंभीर चर्चा रंगली असून, अशा घटनांना आळा घालण्यासाठी समाजातील प्रत्येक घटकाने जबाबदारीने पावले उचलण्याची गरज व्यक्त केली जात आहे.
